काठमाडौं, दक्षिणकाली नगरपालिका-५ फर्पिङबाट अवैध लागूऔषध खैरो हेरोइन जस्तो देखिने पदार्थ करिब २ ग्राम ३ सय १० मिलिग्राम सहित २ जनालाई सोमबार राति प्रहरीले पक्राउ गरेको छ । पक्राउ पर्नेहरूमा सिराहा, सिरहा नगरपालिका-५ रमौल घर भएका २४ वर्षीय मोहम्मद आसिम सिद्दिकी र २२ वर्षीय मोहम्मद अरमान आलम रहेका छन् । इलाका प्रहरी कार्यालय फर्पिङबाट खटिएको प्रहरीले सिराहाबाट काठमाडौंतर्फ आउँदै गरेको बा.६४ प ६८७३ नम्बरको मोटरसाइकलमा सवार उनीहरूलाई उक्त पदार्थ सहित पक्राउ गरेको हो ।

     त्यसैगरी काठमाडौं महानगरपालिका-१६ बसन्तनगर गुम्बास्थित टहराबाट अवैध लागूऔषध खैरो हेरोइन जस्तो देखिने पदार्थ १४ ग्राम ६४ मिलिग्राम, मोबाइल ६ थान र नगद ५५ हजार २० रूपैयाँ सहित ३ जनालाई सोमबार राति प्रहरीले पक्राउ गरेको   छ । पक्राउ पर्नेहरूमा सोही ठाउँ बस्ने नुवाकोट ककनी गाउँपालिका-३ घर भएका २८ वर्षीय रविन तामाङ, दोलखा गौरीशंकर गाउँपालिका-३ घर भएका २५ वर्षीय दारिन्जी शेर्पा र काठमाडौं तारकेश्‍वर नगरपालिका-११ कालो ट्याङ्की बस्ने काभ्रे तेमाल गाउँपालिका-९ घर भएका २७ वर्षीय अर्जुन विक रहेका छन् । प्रहरी विट बसन्तनगर गुम्बाबाट खटिएको प्रहरीले उनीहरूलाई उक्त पदार्थ सहित पक्राउ गरेको हो ।   घटना सम्बन्धमा आवश्यक अनुसन्धान भई रहेको छ ।