काठमाडौं, ३० साउन

            काठमाडौं उपत्यका प्रहरी कार्यालयका कार्यालय प्रमुख प्रहरी अतिरिक्त महानिरीक्षक टेक बहादुर तामाङको प्रमुख आतिथ्यतामा सामुदायिक सेवा केन्द्र एवं सामुदायिक प्रहरी सेवा केन्द्र कुलेश्वरले आयोजना गरेको उद्‍घोषण तथा क्षमता अभिवृद्धि प्रशिक्षण तालीम समापन समारोह कार्यक्रम मेघा व्याङ्क्वेट कालिमाटीको सभाहलमा शुक्रबार सम्पन्न भएको छ ।

              कार्यक्रमलाई सम्बोधन गर्नुहुदै प्रहरी अतिरिक्त महानिरीक्षक टेक बहादुर तामाङले उद्‍घोषण तथा क्षमता अभिवृद्धि तालीमले सम्बन्धित व्यक्तित्वमा सकारात्मक उर्जा प्रवाह गरी आफ्नो अभिव्यक्ति शैलीद्वारा लक्षित समूहलाई विचार तथा चिन्तन व्यक्त गर्न सहज पुर्‍याउनेमा विश्वास व्यक्त गर्नु भयो ।

      कार्यक्रमका सभाध्यक्ष सामुदायिक सेवा केन्द्र एवं सामुदायिक प्रहरी सेवा केन्द्र कुलेश्वरका अध्यक्ष राजकुमार विष्टले प्रहरी र नागरिकको सहयोग, समन्वय र सहकार्यले मात्र सभ्य एवम् सुरक्षित समाज निर्माण गर्न सकिनेमा जोड दिनुभयो ।

     उद्‍घोषण तथा क्षमता अभिवृद्धि प्रशिक्षण तालीमका प्रशिक्षक सजना नकर्मीले आ-आफ्नो मन्तव्य व्यक्त गर्नुभएको उक्त कार्यक्रममा तालीमका प्रायोजकलाई सम्मान-पत्र, तालीम प्रशिक्षकलाई प्रशंसा-पत्र तथा प्रशिक्षार्थीहरुलाई प्रमाण-पत्र वितरण गरिएको थियो भने आगन्तुक प्रमुख अतिथि, विशेष अतिथि तथा अन्य अतिथिहरुमा मायाको चिनो प्रदान गरिएको थियो । सो तालीम नेपाल प्रहरीका तर्फबाट १९ जना तथा निजामती कर्मचारी र सर्वसाधारण तर्फबाट ४० जना गरी ५९ जना प्रशिक्षार्थीहरुलाई  प्रदान गरिएको थियो ।

   कार्यक्रममा सामुदायिक सेवा केन्द्र एवं सामुदायिक प्रहरी सेवा केन्द्र कुलेश्वरका पदाधिकारीहरू, काठमाडौं महानगरपालिका वडा नम्वर -१२,१३ र १४ का जनप्रतिनिधिहरु, विभिन्न सरकारी तथा गैरसरकारी संस्थाका पदाधिकारीहरू, स्थानीय समाजसेवी लगायत प्रहरी अधिकृत तथा जवानहरूको उपस्थिति रहेको थियो ।