काठमाडौं, २३ जेठ

काठमाडौं उपत्यका प्रहरी कार्यालय रानीपोखरीका प्रहरी वरिष्ठ उपरीक्षक शेखर खनालको प्रमुख आतिथ्यतामा आत्महत्या रोकथाम र लागू औषध दुर्व्यसन न्यूनीकरण सम्बन्धी सचेतनामूलक प्रशिक्षण कार्यक्रम शुक्रबार सम्पन्न भएको छ ।   

काठमाडौं उपत्यका प्रहरी कार्यालय रानीपोखरीद्वारा संचालित लागूऔषध विरूद्धको महाअभियान अन्तर्गत तारकेश्वर नगरपालिका वडा नं. १० र परिवर्तनका निम्ति सहकार्य नेपालको संयुक्त आयोजना एवम् सामुदायिक प्रहरी सेवा केन्द्र बोहराटारको सहकार्यमा त्रिवेणी  बैंक्वेट मनमैजुमा आत्महत्या रोकथाम र लागूऔषध दुर्व्यसन न्यूनीकरण सम्बन्धी सचेतनामूलक प्रशिक्षण कार्यक्रम सम्पन्न भएको हो । 

     कार्यक्रममा  प्रमुख अतिथि प्रहरी वरिष्ठ उपरीक्षक शेखर खनालले आजका विद्यार्थी भोलिको राष्ट्र निर्माणका खम्बाका रुपमा रहेकाले आफ्नो अभिभावकको सन्तान प्रति गरेको समर्पणलाई सम्मान गरी लागू औषध जस्तो गम्भीर कुलतमा नफस्नको निम्ति गलत नीयतका साथीभाई तथा लागूऔषध कारोबारीको प्रलोभनमा नपर्न स्वयम सचेत हुनुपर्नेमा जोड दिनुभयो ।  साथै अपराध भएको वा हुन लागेको आफुले देखेमा नेपाल प्रहरी हटलाइन नम्बर १०० (सय) मा फोन गरी तुरुन्त सूचना दिन समेत अनुरोध गर्नुभयो । 

कार्यक्रममा तारकेश्वर नगरपालिका वडा नं. १० का अध्यक्ष कुमार राई, मानसिंह धर्म मा.वि. का प्रधानाध्यापक केदार गजुरेल ले आ-आफ्नो शुभकामना मन्तव्य व्यक्त गर्नुभएको थियो ।  साथै कार्यक्रमका सभापति परिवर्तनका निम्ति सहकार्य नेपालका अध्यक्ष रबिन प्रसाद थपलियाले धन्यवाद मन्तव्य व्यक्त गर्दै सभा विसर्जन गर्नुभएको थियो ।  

          काठमाडौं उपत्यका प्रहरी कार्यालयका प्रहरी उपरीक्षक शालिकग्राम शर्माले लागूऔषधको परिचय, वर्गीकरण, असरहरू, लागूऔषध ओसारपसार र सेवनको तथ्याङ्क, कानूनी प्रावधान लगायतका विषयमा र प्रहरी निरीक्षक शैलेजा पाण्डेले आत्महत्या न्यूनीकरण सम्बन्धी प्रस्तुतीकरण प्रस्तुत गर्नुभएको थियो । उक्त अवसरमा लागूऔषध सम्बन्धी सचेतनामूलक भिडियो समेत प्रस्तुत गरिएको थियो ।  

कार्यक्रममा काठमाडौं उपत्यका प्रहरी कार्यालयका प्रहरी नायब उपरीक्षक रविराज थपलिया, प्रहरी बृत्त बालाजुका प्रमुख प्रहरी नायव उपरीक्षक ज्ञान बहादुर विष्ट, नगरपालिकाका जनप्रतिनिधि तथा पदाधिकारीहरू, शिक्षक तथा विद्यार्थीहरू, अभिभावकहरू, समाजसेवीहरू,  विभिन्न सरकारी तथा गैरसरकारी संस्थाका पदाधिकारीहरू लगायत प्रहरी अधिकृत तथा जवानहरूको उपस्थिति रहेको थियो ।