काठमाडौं, २५ पुस

         काठमाडौं उपत्यका प्रहरी कार्यालयका कार्यालय प्रमुख प्रहरी अतिरिक्त महानिरीक्षक टेक बहादुर तामाङद्वारा बिहिवार त्रिभुवन अन्तर्राष्ट्रिय विमानस्थल सुरक्षा कार्यालय, गौचर, काठमाडौंको निरीक्षण तथा  निर्देशन कार्यक्रम सम्पन्न भएको छ ।

      निर्देशन कार्यक्रमलाई सम्बोधन गर्नुहुँदै प्रहरी अतिरिक्त महानिरीक्षक तामाङले त्रिभुवन अन्तर्राष्ट्रिय विमानस्थलको सुरक्षा व्यवस्थाले अन्तर्राष्ट्रिय स्तरमा राष्‍ट्रको सुरक्षाको स्तर झल्काउनुका साथै नेपाल प्रहरीको गरिमा समेत अभिबृद्दि गर्ने हुँदा अन्तर्राष्ट्रिय विमानस्थलमा कार्यरत हरेक प्रहरी कर्मचारीले “ जिब्रोको गरिमा मिठो बोलिमा” भन्ने नारालाई व्यवहारमा लागु गर्दै हरेक नागरिकको  समान सम्मान प्रदान गर्नुका साथै मानव अधिकारको संरक्षण सगैं नागरिकमैत्री प्रहरीको भूमिका निर्वाह गर्नु पर्ने बताउनु भयो । साथै डिउटीको समयमा व्यवसायिक मर्यादा विपरितका कार्य गरि प्रहरी बर्दीमा दाग लगाउने प्रहरी कर्मचारीलाई कुनै प्रकारको क्षम्य नहुने समेत बताउनु भयो ।

प्रहरी अतिरिक्त महानिरीक्षक तामाङले त्रिभुवन अन्तर्राष्ट्रिय विमानस्थल सामान्य नागरिकदेखि अति विशिष्ठ व्यक्तिसम्म साथै आपराधिक मनसाय भएका स्वदेशी/विदेशी नागरिकको आवागमन हुने प्रमुख स्थान समेत भएकोले संभावित खतराको मूल्याङ्कन (Threat Assessment) गरी सोही बमोजिम सुरक्षा योजना (Operational Plan) बनाई विभिन्न निकायसँग व्यवसायिक समन्वय गरी उच्च मनोवलका साथ प्रहरी जनशक्ति र प्रविधिको प्रयोग पूर्ण व्यवसायिक तवरले गर्न निर्देशन दिनु भयो ।

   कार्यक्रममा काठमाडौं उपत्यका प्रहरी कार्यालय रानीपोखरीका प्रहरी नायव महानिरीक्षक ध्रुव राज राउत, त्रिभुवन अन्तर्राष्ट्रिय विमानस्थल सुरक्षा कार्यालयका कार्यालय प्रमुख प्रहरी वरिष्ठ उपरीक्षक सोमेन्द्र सिंह राठौर  लगायत सिनियर प्रहरी अधिकृत, जुनियर प्रहरी अधिकृत तथा प्रहरी हवल्दार, जवानहरुको उपस्थिति रहेको थियो ।