आज मिति २०८२/०६/२६ गते, काठमाडौं उपत्यका प्रहरी कार्यालयका कार्यालय प्रमुख प्रहरी अतिरिक्त महानिरीक्षक दान बहादुर कार्कीको उपस्थितिमा प्रहरी नायव महानिरीक्षक ओम बहादुर रानाको बिदाई तथा फेरि भेटौला कार्यक्रम सम्पन्न भएको छ । 

      तालुक नेपाल सरकार गृह मन्त्रालय (माननीय गृहमन्त्रीस्तर) को मिति २०८२।०६।२३ गतेको निर्णयानुसार सुदुरपश्चिम प्रदेश प्रहरी कार्यालय धनगढी कैलाली सरुवा भई कार्यक्षेत्र तर्फ प्रस्थान गर्न लाग्नु भएका प्रहरी नायव महानिरीक्षक ओम बहादुर रानालाई यस कार्यालयको तर्फबाट प्रहरी अतिरिक्त महानिरीक्षक दान बहादुर कार्कीले खादा तथा “मायाको चिनो” प्रदान गर्नुभएको थियो ।               

      बिदाई तथा फेरि भेटौला समारोहलाई सम्बोधन गर्नुहुदै प्रहरी अतिरिक्त महानिरीक्षक कार्कीले प्रहरी नायव महानिरीक्षक ओम बहादुर रानाले यस कार्यालयमा कार्यरत रहँदा प्रदान गरिएका कार्य कुशलतापूर्वक निर्वाह गर्नु भएकोमा धन्यवाद व्यक्त गर्दै नयाँ कार्यक्षेत्रको लागि उहाँलाई हार्दिक शुभकामना समेत प्रदान गर्नु भयो । साथै आगामी दिनहरुमा आउन सक्ने सम्भावित सुरक्षा चुनौतिलाई सामना गर्न तत्पर भई  सङ्गठनको श्रीबृद्धिका खातिर निरन्तर लागिरहनुका साथै व्यावसायिक तथा जनमुखी सेवा प्रवाह गर्न निर्देशन समेत दिनु भयो ।

     प्रहरी नायव महानिरीक्षक ओम बहादुर रानाले यस कार्यालयमा कार्यरत रहँदा प्राप्त गरेका अनुभव,अवसर र चुनौतीको सम्बन्धमा  मन्तव्य प्रस्तुत गर्नु भएको उक्त कार्यक्रममा प्रहरी वरिष्ठ उपरीक्षक शेखर खनाल,प्रहरी वरिष्ठ उपरीक्षक दीप शम्शेर ज.ब.रा., प्रहरी वरिष्ठ उपरीक्षक प्रविण धिताल, सिनियर प्रहरी अधिकृतहरू लगायत अन्य प्रहरी कर्मचारीहरूको उपस्थिति रहेको थियो ।