माननीय गृहमन्त्री रमेश लेखकद्वारा काठमाडौं उपत्यका प्रहरी कार्यालयको निरीक्षण तथा निर्देशन

२०८२-०४-२३

A
A^-
A⁺

काठमाडौं, २३ साउन

माननीय गृहमन्त्री रमेश लेखकले शुक्रबार काठमाडौं उपत्यका प्रहरी कार्यालय रानीपोखरीको निरीक्षण भम्रण गर्नुका साथै जिल्ला प्रहरी परिसर काठमाडौं स्थित काठमाडौं उपत्यका प्रहरी कार्यालयको परिचालन कक्षको अवलोकन समेत गर्नुभयो । सो अवसरमा गृहमन्त्री लेखकले उक्त परिचालन कक्ष सम्बन्धी गतिविधिबारे जानकारी समेत लिनुभयो । माननीय गूहमन्त्री लेखकसंग गृह सचिव गोकर्णमणी दुवाडी, प्रहरी महानिरीक्षक दिपक थापा, गृह मन्त्रालयका प्रवक्ता सह-सचिव आनन्द काफ्ले निरीक्षणमा सरिक हुनुहुन्थ्यो ।

निरीक्षण पश्चात जिल्ला प्रहरी परिसर काठमाडौंमा आयोजित कार्यक्रममा गृहमन्त्री लेखकले काठमाडौं उपत्यका प्रहरी कार्यालय एवम् मातहत प्रहरी कार्यालयमा कार्यरत प्रहरी कर्मचारीहरूलाई निर्देशन समेत दिनुभयो ।

कार्यक्रममा गृहमन्त्री लेखकले उपत्यकामा शान्ति सुव्यवस्था कायम गर्न काठमाडौं उपत्यका प्रहरी कार्यालयले महत्वपूर्ण भूमिका निर्वाह गर्दै आइरहेको चर्चा गर्दै नागरिकलाई सरल एवम् सुलभ ढंगले प्रहरी सेवा प्रवाह गर्न र नागरिकले सुरक्षाको अनुभूति प्राप्त गर्ने गरी उत्कृष्ट कार्यसम्पदान गर्न उपस्थित प्रहरी कर्मचारीहरूलाई निर्देशन दिनुभयो । प्रहरी कार्यालयले दिने सेवालाई सर्वसुलभ र झन्झट रहित बनाउनुपर्नेमा जोड दिँदै शिष्ट आचरण एवम् व्यवहारका साथ सेवाग्राहीको समस्या एवम् गुनासोलाई सम्बोधन गर्नुपर्ने उहाँले बताउनुभयो ।

गृहमन्त्री लेखकले प्रहरीले निर्वाह गरेको काम कारवाही जनताप्रति उत्तरदायी र जवाफदेही हुनुपर्ने उल्लेख गर्दै मानव अधिकारको संरक्षण एवम् सम्वर्द्धनमा थप सजग भई महिला हिंसा, घरेलु हिंसा, बालबालिका एवम् ज्येष्ठ नागरिक विरूद्ध हुने गतिविधि प्रति थप संवेदनशील हुनुपर्ने बताउनुभयो । लागूऔषध, आत्महत्या, साइबर अपराध, अनलाइन ठगी, आर्थिक अपराध, सवारी दुर्घटना चुनौतिको रूपमा देखा परेकोले यस्ता चुनौतिको समाधान गर्न प्रविधिको उच्चतम प्रयोग गर्दै अझ बढी क्रियाशील हुनुपर्ने बताउनुभयो ।

कार्यक्रममा गृहसचिव गोकर्णमणि दुवाडीले शान्ति सुरक्षा कायम गर्न, कानूनको पालना, अपराध नियन्त्रण एवम् अनुसन्धान लगायतका कार्यहरूमा नेपाल प्रहरीले निर्वाह गरेको भूमिका प्रशंसनीय रहेको बताउनुभयो । नागरिक सँग प्रत्यक्ष सम्बन्ध राखि नागरिकका समस्यालाई सम्बोधन तथा समाधान गरी सुरक्षाको प्रत्याभूति दिलाउन अझ बढि क्रियाशील भई कार्य गर्न उपस्थित प्रहरी कर्मचारीहरूलाई उहाँले आग्रह गर्नुभयो । आफ्नो व्यवहार र आचरणलाई शिष्ट बनाई व्यक्तिगत स्वार्थ भन्दा माथि उठेर नागरिकलाई केन्द्रमा राखेर उत्कृष्ट प्रहरी सेवा प्रवाह गर्नुपर्नेमा समेत उहाँले जोड दिनुभयो । प्रहरीलाई आवश्यक स्रोतसाधन, सुविधा सहितको पूर्वाधारहरू र प्रविधियुक्त बनाउनेतर्फ गृह मन्त्रालय सदैव क्रियाशील रहेको बताउनुभयो ।

कार्यक्रममा प्रहरी महानिरीक्षक दिपक थापाले उपत्यकामा शान्ति सुव्यवस्था कायम गर्न, अपराध नियन्त्रण एवम् अनुसन्धान, ट्राफिक व्यवस्थापनका साथसाथै विपद् व्यवस्थापनमा समेत काठमाडौं उपत्यका प्रहरी कार्यालयले सीमित जनशक्ति, स्रोतसाधान एवम् प्रविधिका बाबजूद पनि प्राप्त जिम्मेवारी उत्कृष्ट रूपमा निर्वाह गर्दै आइरहेको बताउनुभयो । सूचना संकलनलाई अझ प्रभावकारी बनाउँदै शान्ति सुरक्षालाई थप मजबुद बनाउन उपत्यका प्रहरी कार्यालय सदैव क्रियाशील रहेको समेत उहाँले बताउनुभयो ।

काठमाडौं उपत्यका प्रहरी कार्यालयका प्रमुख प्रहरी अतिरिक्त महानिरीक्षक टेक बहादुर तामाङले धन्यवाद मन्तव्य व्यक्त गर्दै माननीय गृह मन्त्रीज्यूबाट प्राप्‍त निर्देशनहरुलाई पूर्ण रुपमा व्यवहारमा उतार्ने प्रतिबद्धता व्यक्त गर्नु भयो । उक्त कार्यक्रममा प्रहरी वरिष्ठ उपरीक्षक शेखर खनालले काठमाडौं उपत्यका प्रहरी कार्यालयको परिचय, कार्यरत जनशक्ति तथा उपलब्ध साधन स्रोतको विवरण, हासिल उपलब्धिहरु, समस्या एवम् चुनौति तथा तालुक मन्त्रालयसंग अपेक्षा लगायतका विषयमा प्रस्तुतीकरण गर्नुभएको थियो ।

कार्यक्रममा गृहमन्त्रालयका पदाधिकारीहरू, वरिष्ठ प्रहरी अधिकृत लगायत प्रहरी अधिकृत तथा जवानहरूको उपस्थिति रहेको थियो ।

सम्बन्धित समाचार

सेवा निवृत्त हुन लाग्नु भएका प्रहरी अतिरिक्त महानिरीक्षक टेक बहादुर तामाङको विदाइ

२०८२-०५-१८

काठमाडौं, १८ भदौ३० वर्ष सेवा अवधि पूरा गरी मिति २०८२ साल भदौ १९ गते देखि सेवा निवृत्त हुन लाग्नु भएका प्रहरी अतिरिक्त महानिरीक्षक टेक बहादुर तामाङलाई आज काठमाडौं उपत्यका प्रहरी कार्यालयमा आयोजित विशेष समारोह बीच विदाइ गरिएको छ । विदाइ समारोहलाई सम्बोधन गर्नुहुदै प्रहरी अतिरिक्त महानिरीक्षक टेक बहादुर तामाङले राष्ट्र र नागरिकको सेवाको खातिर नेपाल प्रहरी संगठनले सुम्पेको जिम्मेवारी व्यावसायिक रूपमा सक्षमताका साथ निर्वाह गर्न सहयोग र सहकार्य गर्ने आफू मातहतका सम्पूर्ण प्रहरी कर्मचारीहरू प्रति धन्यवाद साथै कृतज्ञता व्यक्त गर्नुभयो । सेवा अवधिभर आम नागरिकलाई न्याय र सुरक्षाको अनुभूति दिन र संगठनको हक हितका लागि केन्द्रित भई काम गरेको उल्लेख गर्दै आफ्नो व्यावसायिक जीवनका दौरान हरेक समयको सही सदुपयोग गरेको साथै मातहत प्रहरी कर्मचारीहरुलाई समेत समयको हरेक पलको महत्वलाई बुझी त्यसको सही सदुपयोगको लागि निर्देशन समेत दिनु भयो । प्रहरी अतिरिक्त महानिरीक्षक तामाङले आगामी दिनहरुमा समेत संगठनको श्रीवृद्धिका लागि रचनात्मक सहयोग गर्न आफू तयार रहेको र हरेक सेवा निवृत्त प्रहरी कर्मचारीले समेत नेपाल प्रहरी संगठनलाई सहयोग गर्नुपर्नेमा जोड दिनुभयो । कार्यक्रममा धन्यवाद मन्तव्य व्यक्त गर्दै प्रहरी नायब महानिरीक्षक ओम बहादुर रानाले सेवानिवृत्त हुन लाग्नुभएका प्रहरी अतिरिक्त महानिरीक्षक टेक बहादुर तामाङ सेवा अवधि भर कुशल प्रशासक तथा सक्षम नेतृत्वकर्ता भएको जिकिर गर्दै काठमाडौं उपत्यका प्रहरी कार्यालयको प्रमुखको रुपमा जिम्मेवारी वहन गर्दा प्राप्त उपलब्धिका सम्बन्धमा जानकारी दिनु भयो साथै आगामी दिनहरुमा समेत संगठनको श्रीवृद्धि र प्रहरी सेवालाई अझै प्रभावकारी तथा नागरिक मैत्री बनाउनका लागि पछि सम्म पनि उहाँबाट सल्लाह, सुझाव र निर्देशन निरन्तर प्राप्त हुने विश्वास व्यक्त गर्नुभयो । सोही अवसरमा प्रहरी नायब महानिरीक्षक राना तथा मातहत कार्यालयका कार्यालय प्रमुखहरुले समेत सेवानिवृत्त हुन लाग्नु भएका प्रहरी अतिरिक्त महानिरीक्षक टेक बहादुर तामाङलाई खादा, माला तथा मायाको चिनो प्रदान गर्नुभएको थियो । विदाइ समारोह अगाडी प्रहरी अतिरिक्त महानिरीक्षक टेक बहादुर तामाङले यस कार्यालयको कार्यालय भवनमा नव- निर्मित सभाहल, पुस्तकालय साथै सङ्ग्रहालयको रिवन काटी उद्धाटन समेत गर्नु भएको थियो । कार्यक्रममा काठमाडौं उपत्यका प्रहरी कार्यालय तथा मातहतका प्रहरी वरिष्‍ठ उपरीक्षकहरु, प्रहरी उपरीक्षकहरु, प्रहरी नायब उपरीक्षकहरु, प्रहरी निरीक्षकहरु, जुनियर प्रहरी अधिकृतहरु, लगायत अन्य प्रहरी कर्मचारीहरुको उपस्थिति रहेको थियो ।

प्रहरी अतिरिक्त महानिरीक्षक टेक बहादुर तामाङद्वारा प्रहरी वृत्त थानकोटको नवनिर्मित भवनको उद्‍घाटन

२०८२-०५-१६

काठमाडौं, १६ भदौ प्रहरी अतिरिक्त महानिरीक्षक टेक बहादुर तामाङले प्रहरी वृत्त थानकोटको नवनिर्मित कार्यालय भवन तथा व्यारेकको सोमबार आयोजित कार्यक्रमबीच उद्‍घाटन गर्नुका साथै नवनिर्मित भवनहरूको निरीक्षण समेत गर्नुभयो । नेपाल सरकारबाट प्राप्त बजेट अन्तर्गत रही नेपाल प्रहरी प्रधान कार्यालय,भौतिक पूर्वाधार निर्देशनालयबाट योजना बनाई जिल्ला प्रहरी परिसर काठमाडौंको मातहत प्रहरी वृत्त थानकोटको कार्यालय तथा व्यारेक भवनको सम्पूर्ण लागत ६ करोड ७१ लाख ३४ हजार ९ सय २० रुपैयाँ ०२ पैसामा निर्माण सम्पन्न भएको थियो । उद्घघाटन कार्यक्रमलाई सम्बोधन गर्नुहुदै प्रहरी अतिरिक्त महानिरीक्षक टेक बहादुर तामाङले काठमाडौं उपत्यकाको प्रमुख नाकाको मध्येको एक नागढुङ्गा क्षेत्रमा अहोरात्र नागरिकको सेवामा खटिने प्रहरी कर्मचारीहरूको लागि आवास भवन आधारभूत आवश्यकता रहेको चर्चा गर्दै आधुनिक, सुन्दर र सुविधा सम्पन्न भवनहरूले प्रहरी कर्मचारीहरूमा जिम्मेवारी निर्वाह गर्न थप उर्जा र हौसला दिनेमा विश्वास व्यक्त गर्नुभयो । नवनिर्मित भवनहरू सबैको साझा सम्पत्ति भएको उल्लेख गर्दै प्रहरीलाई सेवा प्रवाहमा सहज पहल कदमी गर्ने चन्द्रागिरी नगरपालिका सम्पुर्ण नागरिक समाज, जनप्रतिनिधि तथा सम्पुर्ण स्थानियबासीलाई धन्यवाद व्यक्त गर्नुभयो । काठमाण्डौ उपत्यका प्रहरी कार्यालयको ‘सुरक्षित उपत्यका, हाम्रो प्रतिवद्दता: अभियानलाई मूर्तरूप दिन उपत्यका प्रहरी कार्यालय शान्ति,सुरक्षा तथा सुशासनमा थप व्यावसायिक बन्दै जाने प्रतिवद्वता व्यक्त गर्दै प्रहरी अतिरिक्त महानिरीक्षक टेक बहादुर तामाङले विवेकपूर्ण निर्णयबाट कानूनसम्मत तवरले प्रहरी कारवाही गर्न निर्देशन समेत दिनुभयो । कार्यक्रममा चन्द्रागिरी नगरपालिकाका नगर प्रमुख घनश्याम गिरी, चन्द्रागिरी नगरपालिकाका नगर उप-प्रमुख बसन्ती श्रेष्ठ,काठमाडौं जिल्लाका प्रमुख जिल्ला अधिकारी छवी रिजाल,जिल्ला सरकारी वकिल कार्यालयका सहन्यायाधिवक्ता रामहरि शर्मा काफ्ले,काठमाडौं उपत्यका प्रहरी कार्यालय रानीपोखरीका प्रहरी नायव महानिरीक्षक ओम बहादुर राना, नेपाल सशस्त्र प्रहरी नायव महानिरीक्षक सुरेश कुमार श्रेष्ठ,जिल्ला प्रहरी परिसर काठमाडौका प्रहरी वरिष्ठ उपरीक्षक विश्व अधिकारी,काठमाडौ उपत्यका ट्राफिक प्रहरी कार्यालयका प्रहरी वरिष्ठ उपरीक्षक नवराज अधिकारी, पूर्व प्रहरी कर्मचारीहरु, स्थानीय जनप्रतिनिधिहरू र स्थानीय भद्र भलादमीहरू लगायत उपस्थितिमा सम्पन्न भएको थियो ।

कार्यसम्पादन सम्झौतामा हस्ताक्षर

२०८२-०५-१५

काठमाडौं, १५ भदौ काठमाडौं उपत्यका प्रहरी कार्यालयका प्रमुख प्रहरी अतिरिक्त महानिरीक्षक टेक बहादुर तामाङले काठमाण्डौ उपत्यका प्रहरी कार्यालय मातहत कार्यालय प्रमुखहरूसँग बार्षिक कार्यसम्पादन सम्झौतामा हस्ताक्षर गर्नु भएको छ ।संगठन प्रमुख प्रहरी महानिरीक्षक दिपक थापा र काठमाडौं उपत्यका प्रहरी कार्यालयका प्रमुख प्रहरी अतिरिक्त महानिरीक्षक टेक बहादुर तामाङ बीच गत भदौ ८ गते बार्षिक कार्यसम्पादन सम्झौता भए अनुसार काठमाण्डौ उपत्यका प्रहरी कार्यालय रानीपोखरीमा आईतवार एक समारोहकाबीच मातहत कार्यालयका प्रमुखहरूसँग आर्थिक वर्ष २०८२/०८३ को कार्य सम्पादन सम्झौता पत्रमा हस्ताक्षर गर्नु भएको हो । कार्यक्रममा प्रहरी अतिरिक्त महानिरीक्षक टेक बहादुर तामाङ र जिल्ला प्रहरी कार्यालय काठमाडौं, भद्रकालीका प्रमुख प्रहरी वरिष्‍ठ उपरीक्षक विश्व अधिकारी, त्रिभुवन अन्तर्राष्ट्रिय विमानस्थल सुरक्षा कार्यालयका प्रमुख प्रहरी वरिष्‍ठ उपरीक्षक सोमेन्द्र सिंह राठौर, जिल्ला प्रहरी कार्यालय ललितपुर, जावलाखेलका प्रमुख प्रहरी वरिष्‍ठ उपरीक्षक श्याम कृष्ण अधिकारी, काठमाडौं उपत्यका ट्राफिक प्रहरी कार्यालय, रामशाहपथका प्रमुख प्रहरी वरिष्‍ठ उपरीक्षक नवराज अधिकारी, काठमाडौं उपत्यका अपराध अनुसन्धान कार्यालय, टेकुका निमित्त प्रमुख प्रहरी उपरीक्षक काजी कुमार आचार्य, सर्वोच्च/विशेष अदालत समन्वय तथा सुरक्षा प्रहरी इकाई, रामशाहपथका प्रमुख प्रहरी उपरीक्षक सुरेश प्रसाद काफ्ले,नेपाल प्रहरी पहरा गण, सामाखुसीका प्रमुख प्रहरी उपरीक्षक पदम बहादुर बिष्ट, काठमाडौं उपत्यका सशस्त्र प्रहरी गण नं. २,महाराजगंजका प्रमुख प्रहरी उपरीक्षक प्रजित के.सि., काठमाडौं उपत्यका प्रहरी शिक्षालय, महाराजगंजका प्रमुख प्रहरी उपरीक्षक महेन्द्र कुमार श्रेष्ठ, काठमाडौं उपत्यका, विशेष सुरक्षा प्रहरी गण, त्रिपुरेश्वरका प्रमुख प्रहरी उपरीक्षक भाग्येन्द्र पुरुष ढकाल, जिल्ला प्रहरी कार्यालय भक्तपुरका प्रमुख प्रहरी उपरीक्षक माधव प्रसाद बुढाथोकी, नेपाल प्रहरी सिंहदरवार सुरक्षा गण, सिंहदरवारका प्रमुख प्रहरी नायव उपरीक्षक सिद्धराज न्यौपाने, घुम्ति पर्यटक प्रहरी कार्यालय (पर्यटक प्रहरी कार्यालय) भृकुटीमण्डपका प्रमुख प्रहरी नायव उपरीक्षक कृष्ण राज ओझा, नेपाल प्रहरी अनाश्रित गुल्म, जगन्नाथदेवलका प्रमुख, प्रहरी नायव उपरीक्षक जेसी शाह, नेपाल प्रहरी नारायहिटी सुरक्षा गारद गुल्म, नारायहिटीका प्रमुख, प्रहरी निरीक्षक स्मृति सिलवाल बीच हस्ताक्षर भएको थियो । कार्यक्रममा काठमाडौं उपत्यका प्रहरी कार्यालय र यस कार्यालय मातहत कार्यालयहरूबीच भएको आर्थिक वर्ष २०८१/०८२ को वार्षिक कार्यसम्पादन सम्झौता कार्यान्वयन र कार्य विवरणको विश्लेषण गर्दा कार्य प्रगतिको अवस्था सन्तोषजनक रहेको बताउनुहुदै काठमाडौ उपत्यका प्रहरी कार्यालयका प्रमुख टेक बहादुर तामाङले सम्झौता पत्रमा उल्लेख भएका कार्यहरू प्रभावकारीरुपमा पालना गरी कार्यान्वयन गर्न हुन मातहत कार्यालयका प्रमुखहरूलाई निर्देशन दिनुभयो । प्रहरी सेवालाई चुस्त दुरूस्त एवम् प्रभावकारी बनाउन यो कार्यसम्पादन सम्झौताले महत्वपूर्ण भूमिका खेल्ने बताउनुहुदै उहाँले आर्थिक वर्ष २०८२/०८३ को कार्य सम्पादन सम्झौता पत्रमा नवप्रवर्तन र सिर्जनात्मक कार्यहरू लगायत समसामयिक विषयहरू समेत समावेश गरिएकाले सुरक्षित काठमाडौ उपत्यका (Safer Kathmandu Valley) अभियानमा सबै मातहत कार्यालयहतरूको ऐक्यवद्दता रहने विश्वास व्यक्त गर्नुभयो ।

विपद उद्दार सामाग्री संकलन अभियान अन्तर्गत “Portable Oxygen Cylinder हस्तान्तरण कार्यक्रम” सम्‍पन्‍न ।

२०८२-०५-१२

काठमाडौं, १२ भदौ काठमाडौं उपत्यका प्रहरी कार्यालयको सभाहलमा बिहीबार आयोजित एक कार्यक्रमबीच काठमाडौं उपत्यका प्रहरी कार्यालयका कार्यालय प्रमुख प्रहरी अतिरिक्त महानिरीक्षक टेक बहादुर तामाङलाई Elite Exped संस्थाको तर्फबाट ३ थान Portable Oxygen Cylinder हस्तान्तरण गरिएको छ । विपद प्रतिकार्यको समयमा भुमिगत इनार, बन्द कोठा वा सुरुङहरुमा फसेकाहरुलाई उद्दार गर्न उद्दारकर्ता नेपाल प्रहरीलाई Portable Oxygen Cylinder अति नै आवश्यक रहेको हुँदा सोही विषयलाई मध्यनजर गरी Elite Exped संस्थाको सहयोगमा Portable Oxygen Cylinder हस्तान्तरण गरिएको हो । सोही अबसरमा Elite Exped संस्थाबाट प्राप्त ३ थान Portable Oxygen Cylinder नगर प्रहरी कार्यालय काठमाडौं, जिल्ला प्रहरी परिसर ललितपुर र जिल्ला प्रहरी परिसर भक्तपुरलाई हस्तान्तरण गरिएको थियो । विपद प्रतिकार्य सामाग्री हस्तान्तरण कार्यक्रमलाई सम्बोधन गर्नु हुदै प्रहरी अतिरिक्त महानिरीक्षक तामाङले विपद प्रतिकार्यको समयमा भुमिगत इनार वा सुरुङहरुमा फसेकाहरुलाई उद्दार गर्दा नेपाल प्रहरीका कर्मचारीहरु जोखिम मोलेर उद्दार गर्ने गरेकोमा अबको समयमा Portable Oxygen Cylinder को सहयोगले उद्दार गर्दा प्रहरी कर्मचारीहरु अझ सुरक्षित हुने हुँदा थप हौसला प्रदान हुने विश्वास व्यक्त गर्नु भयो । साथै विगतको समयमा काठमाडौं उपत्यकामा हुने प्राकृतिक विपत्तिलाई न्यूनिकरण गर्न साधन श्रोतको कमीलाई महशुस गरि विपद उद्वार सामाग्री संकलन अभियान संचालन गरी हाल सम्म ९८५ वटा लाईफ ज्याकेट र ७ वटा रबर बोट प्राप्त गरिसकेको जानकारी दिदै काठमाडौं उपत्यका प्रहरी कार्यालयलाई सहयोग पुर्‍याउने Elite Exped संस्थालाई काठमाडौं उपत्यका प्रहरी कार्यालयको तर्फबाट धन्यबाद व्यक्त गर्दै प्राप्त Portable Oxygen Cylinder को सुरक्षित भण्डारण तथा अत्याधिक उपभोगिताको प्रतिवद्धता समेत व्यक्त गर्नु भयो । कार्यक्रममा Elite Exped का Marketing Director गोविन्द बडुवालले मन्तव्य व्यक्त गर्दै विपद्को समयमा अग्र पङ्कतिमा खटिने नेपाल प्रहरीलाई सहयोग प्रदान गर्न पाएकोमा खुसी व्यक्त गर्नु भयो । साथै Elite Exped ले आगामी दिनहरुमा पनि समन्वय,सहकार्य र सहयोगका लागी सधै तयार रहेको बताउनु भयो । Portable Oxygen Cylinder को कुशल उपयोगिताको सम्बन्धमा अभ्यास समेत गरिएको सो कार्यक्रममा प्रहरी नायव महानिरीक्षक ओम बहादुर राना, प्रहरी वरिष्ठ अधिकृतहरू, Elite Expedका प्रतिनिधिहरु लगायत अन्य प्रहरी अधिकृतहरुको उपस्थिति रहेको थियो ।

प्रहरी अतिरिक्त महानिरीक्षक टेक बहादुर तामाङको प्रमुख आतिथ्यतामा शान्ति–सुरक्षा सम्बन्धी अन्तर्कृया कार्यक्रम सम्पन्न ।

२०८२-०५-०६

काठमाडौं, ०६ भदौ काठमाडौं उपत्यका प्रहरी कार्यालयका कार्यालय प्रमुख प्रहरी अतिरिक्त महानिरीक्षक टेक बहादुर तामाङको प्रमुख आतिथ्यतामा सामुदायिक सेवा केन्द्र एवं सामुदायिक प्रहरी सेवा केन्द्र बुढानिलकण्ठले आयोजना गरेको “शान्ति र सुरक्षा : हाम्रो साझा जिम्मेवारी” भन्ने मूल नारासहित जनचेतनामूलक कार्यक्रम शुक्रबार सम्पन्न भएको छ । कार्यक्रममा कार्यक्रमका विशेष अतिथि बुढानिलकण्ठ नगरपालिकाका नगर प्रमुख मिठ्ठाराम अधिकारीले स्थानीयस्तरमा सुरक्षालाई बलियो बनाउन सबै नागरिक सचेत र जिम्मेवार बन्नुपर्ने आवश्यकता औंल्याउदै अपराध नियन्त्रण, आपराधिक गतिविधिको रोकथाम, मादक पदार्थ दुरुपयोगमा न्यूनीकरण, सडक सुरक्षा र सामुदायिक सद्भावलाई प्रवर्द्धन गर्नका लागि नगरपालिका निरन्तर नेपाल प्रहरी संग सहकार्य गर्न प्रतिबद्ध रहेको बताउनु भयो । कार्यक्रमलाई सम्बोधन गर्नुहुदै कार्यक्रमका प्रमुख अतिथि प्रहरी अतिरिक्त महानिरीक्षक टेक बहादुर तामाङले सामुदायिक सेवा केन्द्र एवं सामुदायिक प्रहरी सेवा केन्द्रले नेपाल प्रहरीसंग समन्वय साथै सहकार्य गरी समाजमा रहेको विकृती- विसंगतीहरुलाई न्यूनीकरण गर्न महत्वपुर्ण योगदान दिएको स्मरण गर्दै पछिल्लो समय साना उमेरका विद्यार्थीहरु लागू औषधको दुर्व्यसनी तथा साईबर क्राइमको सिकार समेत भइरहेकाले यस्ता अपराध लगायतका मुद्दाहरुको राकथामको निम्ति स्थानीय स्तरमानै नयाँ रणनीति अपनाइ “सुरक्षित उपत्यका: ह्राम्रो प्रतिवद्धता” अभियानको अबधारणा कार्यान्वयनमा ल्याउने तयारीमा काठमाडौं उपत्यका प्रहरी कार्यालय रहेको जानकारी दिनुभयो । साथै आउदै गरेको हरीतालिका तिज पर्वको समेत उपस्थित सबैलाई शुभकामना ब्यक्त गर्नुभयो । कार्यक्रमका सभाध्यक्ष बुढानिलकण्ठ सामुदायिक विपद् व्यवस्थापन समितिका अध्यक्ष मनोज कुमार श्रेष्ठले प्रहरी र नागरिकको सहयोग, समन्वय र सहकार्यले मात्र सभ्य एवम् सुरक्षित समाज निर्माण गर्न सकिनेमा जोड दिनुभयो । उक्त अवसरमा उपस्थित विभिन्न सहभागीहरूले शान्ति र सुरक्षाबारे आफ्ना अनुभव, सुझाव र जिज्ञासाहरु प्रस्तुत गर्नुभएको उक्त कार्यक्रममा सामुदायिक सेवा केन्द्र एवं सामुदायिक प्रहरी सेवा केन्द्र बुढानिलकण्ठका पदाधिकारीहरू, स्थानिय जनप्रतिनिधिहरु, विभिन्न सरकारी तथा गैरसरकारी संस्थाका पदाधिकारीहरू, स्थानीय समाजसेवी लगायत प्रहरी अधिकृत तथा जवानहरूको उपस्थिति रहेको थियो ।

“आर्थिक वर्ष – २०८१/०८२ को कार्य प्रगति विवरण” सम्बन्धमा सञ्चारकर्मीहरुसंग अन्तरक्रिया तथा छलफल कार्यक्रम सम्पन्न ।

२०८२-०५-०६

काठमाडौं, ०६ भदौ काठमाडौं उपत्यका प्रहरी कार्यालयका कार्यालय प्रमुख प्रहरी अतिरिक्त महानिरीक्षक टेक बहादुर तामाङको प्रमुख आतिथ्यतामा “आर्थिक वर्ष – २०८१/०८२ को कार्य प्रगति विवरण” सम्बन्धमा सञ्चारकर्मीहरुसंग अन्तरकृया तथा छलफल कार्यक्रम सम्पन्न भएको छ । काठमाडौं उपत्यका प्रहरी कार्यालयको सभाहलमा सम्पन्न कार्यक्रममा आर्थिक वर्ष – २०८१/०८२ मा काठमाडौं उपत्यका प्रहरी कार्यालयद्वारा सम्पादन गरेका कार्यहरु तथा भावी योजनाका सम्बन्धमा प्रहरी वरिष्ठ उपरीक्षक शेखर खनालले प्रस्तुतीकरण गर्नु भएको थियो । उक्त अवसरमा सञ्चारकर्मीहरुद्वारा आर्थिक वर्ष – २०८१/०८२ को कार्य प्रगति विवरणका साथै काठमाडौं उपत्यका प्रहरी कार्यालयले आगामी दिनहरुमा चाल्ने पहल कदमीहरुको सम्बन्धमा राय, सुझाव समेत व्यक्त गर्नु भएको थियो । अन्तर्क्रिया चरण पश्चात संचारकर्मीहरुद्वारा राखिएका जिज्ञासाको सम्बोधन गर्दै प्रहरी अतिरिक्त महानिरीक्षक टेक बहादुर तामाङले आर्थिक वर्ष – २०८१/०८२ मा काठमाडौं उपत्यका प्रहरी कार्यालयले काठमाडौं उपत्यकाको सुरक्षा चुनौतीहरुलाई समाधान गर्न कार्यान्वयनमा ल्याएका योजनाहरुको सम्बन्धमा थप जानकारी दिनुका साथै कार्यान्वयनमा ल्याईएका योजनाहरुबाट हासिल गरेका उपलब्धिका सम्बन्धमा जानकारी गराउनु भएको थियो । साथै सुरक्षित काठमाडौ उपत्यका (Safer Kathmandu Valley) को अवधारणालाई पूर्ण रुपमा आत्मसात गर्न सुरक्षित काठमाडौ उपत्यका त्रिवर्षीय कार्ययोजना निर्माण गरी कार्यान्वयन समेत प्रारम्भ गरिएको र कार्ययोजनामा समेटिएका क्रियाकलापका विषयमा थप जानकारी समेत गराउनुभयो । कार्यक्रममा प्रहरी नायव महानिरीक्षक ओम बहादुर राना, प्रहरी वरिष्ठ अधिकृतहरु, विभिन्न सञ्चार माध्यमबाट प्रतिनिधित्व गर्नुहुने सञ्चारकर्मीहरु लगायत प्रहरी कर्मचारीहरुको उपस्थिति रहेको थियो ।