काठमाडौं, ६ वैशाख
            काठमाडौं उपत्यका प्रहरी कार्यालयका कार्यालय प्रमुख प्रहरी अतिरिक्त महानिरीक्षक टेक बहादुर तामाङको प्रमुख आतिथ्यतामा काठमाडौं उपत्यका प्रहरी कार्यालय तथा सशस्त्र प्रहरी बल नेपाल नं. ९ पशुपतीनाथ वाहिनी मातहतका नेपाल प्रहरी तथा सशस्त्र प्रहरी बल नेपालका प्रहरी कर्मचारीहरूसंग अन्तरक्रिया तथा एकिकृत निर्देशन सम्बोधन कार्यक्रम नेपाल प्रहरी प्रधान कार्यालय नक्सालमा शनिबार सम्पन्न भएको छ । 
              उक्त कार्यक्रमलाई सम्बोधन गर्नु हुँदै प्रहरी अतिरिक्त महानिरीक्षक तामाङले निकट भविष्यमा हुने विरोध तथा प्रदर्शनको समयमा भिड नियन्त्रणमा अग्रपङ्त्तिमा खटिने नेपाल प्रहरी तथा सशस्त्र प्रहरी बल नेपालका कर्मचारीहरूलाई सामुहिक भावनाका साथ एक्यवद्ध भई उच्च मनोबलका साथ पूर्ण व्यवसायिक तवरले प्रहरी कार्य गर्न निर्देशन दिनु भयो । आगामी दिनमा हुनसक्ने सुरक्षा चुनौतीहरुलाई निष्तेज गर्न सम्बन्धित कमाण्डरले आफ्नो टोलीलाई  सम्झाई-बुझाई गर्नुका साथै मातहतका कर्मचारीहरूसंग  समन्वय र सहकार्य गर्दै स्वतन्त्र,निष्पक्ष र भयरहित तवरले प्रहरी कार्य गर्दै विरोध प्रर्दशनको समयमा भिड नियन्त्रण गर्दा  प्रहरीले न्युनतम बल प्रयोगको  सिद्धान्तलाई अवलम्बन गर्दै थप सम्बेदनशील भई मानव अधिकारको उच्चतम सम्मान गर्दै कार्य सम्पादन गर्न समेत उहाँले जोड दिनुभयो । सशस्त्र प्रहरी बल नेपाल नं. ९ पशुपतिनाथ वाहिनीका प्रमुख,  सशस्त्र प्रहरी नायव महानिरीक्षक सुरेश कुमार श्रेष्ठले उपत्यका भित्रको शान्ति सुरक्षाका विषयमा एक आपसमा सहकार्य हुनुपर्ने बताउनुभयो ।   
      कार्यक्रममा नेपाल प्रहरीका प्रहरी वरिष्ठ उपरीक्षकहरु, प्रहरी उपरीक्षकहरु,नेपाल प्रहरी तथा सशस्त्र प्रहरी बल नेपालका, सिनियर प्रहरी अधिकृतहरू तथा अन्य प्रहरी कर्मचारीहरूको उपस्थिति रहेको थियो ।