नक्कली जस्तो देखिने ५२ लाख ७५ हजार रूपैयाँसहित नौ जना पक्राउ

२०८०-०४-२६

A
A^-
A⁺

काठमाण्डौ, २६ साउन

नक्कली जस्तो देखिने नेपाली एक हजार दरका नोट ५ हजार २ सय ७५ थान गरी जम्मा ५२ लाख ७५ हजार रूपैयाँ र विभिन्न सामानसहित ९ जनालाई बिहीबार प्रहरीले पक्राउ गरेको छ ।

पक्राउ पर्नेहरूमा सिन्धुपाञ्चोक कोठे बस्ने २५ वर्षीय शुशिल कार्की, सिन्धुपाञ्चोक सुनकोशी गाउँपालिका-६ बस्ने २३ वर्षीय शिव भण्डारी, सिन्धुपाञ्चोक बलेफी गाउँपालिका-७ बस्ने ४० वर्षीय अर्जुन सुबेदी, सिन्धुपाञ्चोक सुनकोशी गाउँपालिका-६ बस्ने २३ वर्षीय मिलन भण्डारी, सुनकोशी गाउँपालिका-६ बस्ने २४ वर्षीय श्रीकृष्ण भण्डारी, झापा कमल गाउँपालिका-३ बस्ने २९ वर्षीय युवराज राई, अछाम मेल्लेख गाउँपालिका-३ बस्ने २१ वर्षीय अर्जुन बुढा, गुल्मी वाडागाउँ गाउँपालिका-२ बस्ने ३४ वर्षीय सागर आचार्य र नवलपरासी सरावल गाउँपालिका-१ बस्ने ५३ वर्षीया पार्वती नेपाली रहेका छन् । उनीहरूमध्ये अर्जुन सुबेदी उपर चोरी, बैंकिङ कसूर, ठगी तथा ठगी र एक्सटर्सन गरी ७ वटा मुद्दा समेत चलेको खुल्न आएको छ ।

चन्द्रागिरी नगरपालिका-२ नागढुङ्गास्थित चेकप्वाइन्टमा लुम्बिनीबाट काठमाण्डौतर्फ आउँदै गरेको लु. १ प ५ नम्बरको पर्यटक बसलाई प्रहरी प्रभाग नागढुङ्गाबाट खटिएको प्रहरीले जाँच गर्दा ढोका छेउको सामान राख्ने डिक्कीमा र्‍याप गरी राखिएको चाउचाउको कार्टुनभित्र नक्कली जस्तो देखिने एक हजार दरका ३ हजार ५ सय ७३ थान गरी जम्मा ३५ लाख ७३ रूपैयाँ फेला परेको थियो । उक्त बसका चालक तथा सह-चालकलाई नियन्त्रणमा लिई थप सोधपुछको क्रममा उक्त कार्टुन लुम्बिनी बसपार्कबाट एक जना मानिसले अचार हो काठमाण्डौ लगिदिनु काठमाण्डौ बसपार्कमा रिसिभ गर्न मानिस आउँछ भनि पठाएको खुल्न आएपछि प्रहरी वृत्त थानकोट समेतबाट खटिएको प्रहरी टोलीले काठमाण्डौ गोंगबु बसपार्क र भक्तपुर चाँगुनारायण नगरपालिका-४ बुढाथोकी गाउँबाट थप नक्कली जस्तो देखिने १ हजार दरका १ हजार ७ सय २ थान गरी जम्मा १७ लाख २ हजार रूपैयाँसहित उनीहरूलाई पक्राउ गरेको हो ।

अनुसन्धानको क्रममा कम्प्युटर सेट १ थान, पेपरकटर मेसिन १ थान, कलर प्रिन्टर १ थान, प्रिन्ट पेपर १ रिम, खुल्ला पेपर २ सय पेज, विभिन्न रङका मसी, कलर केमिकल प्लाष्टिकको बोतल २ वटा, केमिकल, डेकोरेटिङ पाउडर ४ पत्ता, र्‍यापलिङ टेप १ बण्डल, एक हजार दरको नोटको साईजको पेपर ९ थान, बा.६३ प २०७५ नम्बर, बा.प्र. ०२-०३९प ९४०७ नम्बर, बा.प्र. ०२-०३८ प ५६४२ नम्बरको मोटरसाइकल, बा.प्र.०२-०२८ प १३०६ नम्बरको स्कुटर, मोबाइल १२ थान र अर्जुन सुबेदीको नाममा जिल्ला अदालत चितवनको तारेख पर्चा १ थान प्रहरीले बरामद गरेको छ ।

उनीहरू उपर मुद्रा सम्बन्धी कसूरमा जिल्ला अदालत काठमाण्डौबाट ५ दिन म्याद थप अनुमति लिई प्रहरी वृत्त थानकोटबाट थप अनुसन्धान भइरहेको छ ।

सम्बन्धित समाचार

अभौतिक मुद्रा तथा प्रविधिजन्य अपराध नियन्त्रण र अनुसन्धान सम्बन्धी सरोकार निकायहरूसँग एक दिवसीय अन्तरक्रिया सम्पन्न

२०८३-०२-३१

अभौतिक मुद्रा तथा प्रविधिजन्य अपराधहरू बढ्दै गएकोले त्यस्ता प्रकृतीका अपराध नियन्त्रण र अनुसन्धानलाई वस्तुनिष्ठ र परिणाममुखि बनाउनका लागि सम्बन्धित निकायहरूले अपराध नियन्त्रण र अनुसन्धान कार्यमा थप ज्ञान, सिप र क्षमता प्रदान गर्ने उद्देश्यले काठमाडौं उपत्यका प्रहरी कार्यालय रानीपोखरीद्वारा आयोजित अभौतिक मुद्रा तथा प्रविधिजन्य अपराधको नियन्त्रण, रोकथाम तथा प्रभावकारी अनुसन्धानमा सरोकारवाला निकायहरूबीच एक दिवसीय अन्तरक्रिया कार्यक्रम काठमाडौं उपत्यका प्रहरी कार्यालयका, प्रमुख प्रहरी अतिरिक्त महानिरीक्षक ईश्‍वर कार्कीज्यूको प्रमुख आतिथ्यमा नेपाल पुलिस क्लव भृकुटीमण्डलमा सम्पन्न भएको छ । कार्यक्रममा काठमाडौं उपत्यका प्रहरी कार्यालय रानीपोखरीका, प्रहरी नायव महानिरीक्षक ओम प्रसाद अधिकारी,प्रहरी वरिष्ठ उपरीक्षक प्रविण धिताल,प्रहरी उपरीक्षक, महान्यायधिवक्ताको कार्यालय, उच्च सरकारी वकील कार्यालय पाटन, विशेष सरकारी वकील कार्यालय काठमाडौं, काठमाडौं उपत्यका स्थित तीन वटै जिल्लाका जिल्ला सरकारी वकील कार्यालयबाट पाल्नु भएका प्रतिनिधिहरू, नेपाल राष्ट्र बैंक प्रतिनिधी, अन्य बैंकबाट पाल्नु भएका प्रतिनिधीहरू, ईन्टरनेट सेवा प्रदायक संस्था, विभिन्न डिजिटल वालेट कार्यालयका प्रतिनिधीहरू, सरकारी निकाय प्रतिनिधीहरू, प्रहरीका अनुसन्धान अधिकृतहरू, विभिन्न क्षेत्रका विज्ञ तथा अन्य सरोकारवाला निकायका प्रतिनिधीहरूको सहभागिता रहेको थियो ।

जुवातास खेलिरहेको अवस्थामा ६ जना पक्राउ

२०८३-०२-२८

काठमाडौं, चन्द्रागिरी नगरपालिका-५ दाउराडिपो डेरा गरी बस्ने मकवानपुर बकैया गाउँपालिका-४ घर भएका २८ वर्षीय राजु लामाको कोठामा जुवातास खेलिरहेको अवस्थामा राजु समेत ६ जनालाई बुधबार दिउँसो प्रहरीले पक्राउ गरेको छ । प्रहरी वृत्त थानकोटबाट खटिएको प्रहरीले उनीहरूलाई नगद ३ लाख १५ हजार ९ सय रूपैयाँ र ६ बुक तास सहित पक्राउ गरेको हो । साथै उनीहरूले प्रयोग गरेको बा.प्र.०२-०६२ प १९५० नम्बर र बा.प्र.०२-०६६ प १०८६ नम्बरको स्कुटर समेत प्रहरीले बरामद गरेको छ । यस सम्बन्धमा प्रहरीले आवश्‍यक अनुसन्धान गरिरहेको छ ।

अवैध लागूऔषध सहित १ जना पक्राउ

२०८३-०२-२८

काठमाडौं, काठमाडौं महानगरपालिका-४ सुकेधारा चोकबाट नियन्त्रित लागूऔषध ट्रामाडोल १ सय ३० ट्याब्लेट सहित बुढानिलकण्ठ नगरपालिका-१० कपन बस्ने ३३ वर्षीय सुनिल थपलियालाई बुधबार राति प्रहरीले पक्राउ गरेको छ । प्रहरी वृत्त महाराजगंजबाट खटिएको प्रहरीले बा.प्र.०२-०२९ प ७६५८ नम्बरको मोटरसाइकलमा सवार उनलाई उक्त लागूऔषध सहित फेला पारी पक्राउ गरेको हो । यस सम्बन्धमा प्रहरीले आवश्यक अनुसन्धान गरिरहेको छ ।

स्रोत नखुलेको रकम सहित पक्राउ

२०८३-०२-२८

काठमाडौं, काठमाडौं महानगरपालिका-२२ न्यूरोडबाट स्रोत नखुलेको नगद ८ लाख ६१ हजार ५ सय रूपैयाँ सहित भक्तपुर लोकन्थली बस्ने सिन्धुपाल्चोक घर भएका २६ वर्षीय सविन तिमल्सिनालाई बुधबार दिउँसो प्रहरीले पक्राउ गरेको छ । प्रहरी वृत्त जनसेवाबाट खटिएको प्रहरीले उनलाई उक्त नगद सहित पक्राउ गरेको हो । यस सम्बन्धमा प्रहरीले आवश्यक अनुसन्धान गरिरहेको छ ।

वैदेशिक रोजगारीमा विभिन्न देश पठाइदिन्छु भन्दै ठगी गर्ने चार जना पक्राउ

२०८३-०२-२७

काठमाडौं, वैदेशिक रोजगारीमा आकर्षक तलबको प्रलोभनमा पारी विभिन्न देश पठाइदिन्छु भन्दै रकम ठगी गरेको अभियोगमा ४ जनालाई प्रहरीले पक्राउ गरेको छ । पक्राउ पर्नेहरूमा भक्तपुर मध्यपुर थिमि नगरपालिका-३ बस्ने सिन्धुपाल्चोक पाँचपोखरी गाउँपालिका-६ घर भएका २९ वर्षीय सुमन शाही, काठमाडौं बुढानिलकण्ठ नगरपालिका-३ बस्ने रामेछाप उमाकुण्ड गाउँपालिका-७ घर भएका ४७ वर्षीय वेद बहादुर सुनुवार, काठमाडौं टोखा नगरपालिका-६ बस्ने झापा भद्रपुर नगरपालिका-२ घर भएका ४५ वर्षीय अनिल अग्रवाल र ललितपुर, ललितपुर महानगरपालिका-१८ बस्ने तनहुँ भानु गाउँपालिका-१२ घर भएका ३७ वर्षीया विवेक अधिकारी रहेका छन् । पक्राउ मध्ये सुमनले क्रोएशिया पठाइदिन्छु भन्दै ३ जना पीडितहरूबाट १९ लाख रूपैयाँ, वेद बहादुरले स्विजरल्याण्ड पठाइदिन्छु भन्दै १ जना पीडितबाट १ लाख ४० हजार रूपैयाँ, अनिलले अष्ट्रिया पठाइदिन्छु भन्दै १ जना पीडितबाट २ लाख रूपैयाँ र विवेकले फ्रान्स पठाइदिन्छु भन्दै १ जना पीडितबाट ८ लाख रूपैयाँ लिई सम्पर्कविहीन भएको भन्ने पीडितहरूको उजुरीको आधारमा काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले सुमनलाई भक्तपुर मध्यपुर थिमि नगरपालिका-३ बाट सोमबार तथा वेद बहादुरलाई काठमाडौं बुढानिलकण्ठ नगरपालिका-३ बाट, अनिल र विवेकलाई काठमाडौं टोखा नगरपालिका-६ बाट मंगलबार पक्राउ गरेको हो । उनीहरूलाई आवश्यक अनुसन्धान तथा कारबाहीको लागि वैदेशिक रोजगार विभाग ताहाचल काठमाडौं पठाइएको छ ।

चेक अनादर मुद्दाका फरार प्रतिवादी पक्राउ

२०८३-०२-२७

काठमाडौं, चेक अनादर मुद्दाका फरार प्रतिवादी काठमाडौं महानगरपालिका-७ चावहिल बस्ने बुढानिलकण्ठ नगरपालिका-१० घर भएका ६७ वर्षीय फणिन्द्र नेपाललाई सोमबार प्रहरीले पक्राउ गरेको छ । जिल्ला अदालत काठमाडौंको फैसलाले उक्त मुद्दामा २ वर्ष कैद सजाय ठहर भई फरार रहेका उनलाई काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले बुढानिलकण्ठ नगरपालिका-१० कटारीबस्तीबाट पक्राउ गरेको हो । उनलाई फैसला कार्यान्वयनको लागि जिल्ला अदालत काठमाडौंमा पेश गरिएको छ ।